Grænni byggð er vettvangur um sjálfbæra þróun byggðar.

Grænni byggð (áður Vistbyggðaráð) eru félagssamtök sem rekin eru án hagnaðarmarkmiðs og starfa sem partur af alþjóðlega tengslanetinu World Green Building Council sem 70 ríki víðsvegar um heim eru partur af.
Tölur sýna að rekja megi um helming allrar auðlindanýtingar og allt að 30-40% orkunotkunar og 19% útblásturs til byggingariðnaðarins, sem gerir hann að þeim iðnaði sem losar mest af gróðurhúsalofttegundum á heimsvísu. Nýleg skýrsla sýnir að rekja megi um 15% losunar til byggingariðnaðarins í Noregi, þrátt fyrir að þau séu í sömu stöðu og Ísland, að nota endurnýjanlega orku til reksturs bygginga.
Hlutverk okkar er að breyta hinu byggða umhverfi til vistvænni hátta þannig að Ísland standi við skuldbindingar sínar í loftslagsmálum.
Innan Grænni Byggðar eru 56 aðildarfélög um allt land og er stjórn Grænni byggðar skipuð af fulltrúum frá aðildarfélögum þess.

Hlutverk Grænni byggðar

Fræða

  • Framleiðsla og útgáfa á fjölbreyttu fræðsluefni

  • Þátttaka í rannsóknar- og þróunarverkefnum

  • Reglulegir fræðsluviðburðir, pallborðsumræður og opinberir fundir um sjálfbæra þróun byggðar.

Hvetja

  • Við hvetjum aðila á markaði til að leggja sitt af mörkum og sýna samfélagslega ábyrgð í verki

  • Við hvetjum hið opinbera til þess að umbuna verkefnum sem uppfylla ákveðnar umhverfiskröfur með hagrænum hvötum

  • Við hvetjum til þess að hringrásarhagkerfið sé haft að leiðarljósi við byggingu, hönnun og rekstur á mannvirkjum.

Tengja​

  • Við leiðum saman aðila hvaðanæva úr samfélaginu með sjálfbærni í nærumhverfinu að markmiði

  • Grænni byggð tekur virkan þátt í erlendu samstarfi við systursamtök sín, sérstaklega á Norðurlöndum, í gegnum verkefni og viðburði.

Grænni heimsbyggð

Grænni Byggð hefur frá upphafi starfað að fyrirmynd Green Building Council sem starfrækt eru í um 70 löndum um allan heim. Frá 1. nóvember 2018 er Grænni byggð formlegur aðili að þessum alþjóðlegu samtökum.
Samtökin vinna að margvíslegum málefnum sem snerta grænni byggð, sjálfbærri borgir og þéttbýli.
Má til dæmis nefna verkefnið um
Green mortgages í samstarfi við marga af stærstu bönkunum í Evrópu, verkefnið um GreenHomes og herferðin Better Places for People.

World Green Building Council vinnur aktívt með heimsmarkmið Sameinuðu þjóðanna fyrir 2030 sem snertir hið byggða umhverfi.

​

Allur texti fenginn af graennibyggd.is